طريقة تحضير المجدرة مع سلطة خيار وبندورة من ابو جورج حصريا

المكونات: برغل طبخ - عدس - زيت - ملح - بصل حسب الرغبة
طريقة التحضير :
اول شي بنسلق العدس لحتى يستوي شوي وازا سلقناه كتير بفلش بعدي ما بنسلق العدس بنصفيه وبنكب المي لانو ازا استخدمناها بتطلع المجدرة لونها غامق بعد ما نصفي مية العدس بنجيب شوية زيت وبنحطون بالطنجرة وبس يحمى الزيت بنجيب البرغل وبنحطو فوق الزيت وبنحمصو شوي صغيرة هيك بيطلع البرغل كل حبة لحالها يعني بتطلع ( مجدرة مدردرة ) بس نحمصو شوي بنحط العدس المسلوق والملح وبنغمرون بالمي الفاتر لفوق البرغل بعقدة اصبع وبنتركون على نار هادية وبعد شي نص ساعة بنفتح الغطى وبنعملها تحريكة وهاي ضرورية لانو متل ما بقول المتل ( البرغل ازا حركوه للملوك بقدموه والرز ازا حركوه للجاج بزتوه ) بعد ما نحرك البرغل بنرجع بنغطي الطنجرة وبنتركها على نار هادية كتير شي عشر دقايق وبعدها بنطفي النار تحتو
وهلق للي بحب البصل المحمر فوق المجدرة بنجيب بصلة او تنتين وبنقطعون جوانح وبنقليهون بزيت زيتون على نار هادية حتى ما يحترق زيت الزيتون طبعا وبعدنين بنحطون فوق المجدرة بعد ما نسكبها بالجاط او الصينية
طريقة تحضير السلطة
سهلة كتير ليمون وبندورة وخيار بنقطعون مكعبات صغيرة وبنحط ملح حسب الرغبة بالاضافة الى عصير الليمون وملح ونعنع يابس وزيت زيتون
وصحتين وعافية وانشالله تكون عجبتكون الطبخة ورح حطلكون صورة المجدرة حتى تشوفو كيف بتطلع

شو هيد شيفنا